محاولات غير مُوفّقة للتيه
إلــقِ نفسك ككرة صغيرة ..في شوارع محطة الرمل .. هتروح فين ؟
ما بين المنشية و العطارين و محطة مصر .. مافيش فايدة .. عمرك ما تتوه زي ما أي عاشق بيتوه في عيون حبيبته
مُحاولات للتيه ..وسط الشوارع إللي حفظتها صَم .. انزل سعد زغلول ..زي النهاردة و بكرة و بعده .. من أي شهر هجري في ليلة شتوية بعد الساعة 12 ، الطريق دة بتاعك .. كأنه ساحة رقص .. بص للسما للقمرإللي هيطل عليك زي "السبوت لايت "..ما يبقاش غير إنك تلاقي إللي يرقص معاك تانجو في وسط
الطريق
الــعــطــاريــن
أول تعارفي بالمنطقة كان منذ شهر تقريباً ، لما بدأت دروس اللغة اليونانية .. في شارع فؤاد .. نفس المشوار الذي أتدحرجه ..و نفس الطقوس إللي بتحصل وقت نزولي لمحطة الرمل
أتدحرج من محطة الرمل لصفية زغلول ثم شارع فؤاد .. أمر بمركز الإبداع .. أتوقف بضعة ثواني أتذكر مسرحيات الجامعة .. ممكن أخطف نظرة سريعة ع البروجرام ، ثُمّ أنطلق
و في العودة .. الطريق إجباري بيوديني للنبي دانيال ..بحر لو غصت فيه موش هتطلع إلاّ بلولي و صَدَف
و مابقدرش أقاوم إنّي أقلب في الكتب ، بالرغم من إن كوم الكتب إللي عندي فاق حدود المكتبة ، و الكتب دلوقتي بكهنها و أحطها في كراتين ..لكنه داء بدأ يخف شوية مع حلول المحافظ الجديد .. إللي بتر أجمل شوارع محطة مصر .. و ما بقاش لينا منه غير كام كشك على أول الشارع
..
فـي محطة الرمل .. لو اتدحرجت لطريق ما تعرفوش .. امشي لآخره ..هتلاقي الطريق بيضمك ليه من تانـي.. و لو مفتقد الإحساس بالغربة .. امشي و اسأل طول الوقت .. و استعبط على عسكري المرور .. و الناس و سواقين الميكروباصات
امشي الطريق لحبيبتك من جديد
...
.
.رون
Posted by Ρών. at 9:02 PM
25 Comments
ايه الحلاوة دي
توه يا عم براحتك
ليا الشرف اني أكون الدخيل الاول اللى بيعلق على البوست ده
مبدع
رون ..
جولة سريعة لو سمحتِ فى اسكندرية
*****
بشم ريحة اليود ونورس مش هانساه أبدا يوم ما نزلت اسكندرية ومش عرفت اقابلكم
******
دى صورة مختصرة عن اسكندرية بتنط فى دماغى أول ما أسمع اسمها
ممكن تتكلمى عن العجمى أو محرم بك؟؟
انا بعيد عن اسكندرية
وانتو فعلاً شممتوني ريحتها
شكراً على التدوينة الجميلة :)
abutaleb.net
العطاريين
من اقدم احياء الأسكندريه
تحس فيها انك هتقابل الأسكندر فيي شوارعها
نسيت اقول حاجه
حد يعبر اهلي و يزور البلوج بتاعي
الله ريحة اسكندريه فاحت
ايه الجمال ده ياهوه
أنا من المنصوره لكن قعدت فى اسكندريه فتره
انتم ريحة اسكندريه
فول و فلافل و مصطفى كامل و جناكليس و غبريال و ش الجمهوريه
و الله زمان يا اسكندريه
هيييييييه دنيا
أحلى كلام قلته وأجمل كلام سمعته كان في اسكندرية اللي شتاها بيمطر حواديت
Romil :
شوكران شوكران ! .. طبعاً هتوه براحتي ، بس أما نخلّص عقد شراء محطة الرمل .. شرفتنا يا سي روميل :)
Violinaaaa:
يـاه ! ما تفكرينيش الله يخليكي نفسي مرة تيجي آليكسا و نهد حيلك في يوم تمشية عالبحر و في محطة الرمل و المنتزة و بحري ...تعرفي بقى إني عمري ما روحت محرم بك ؟ علاقتي بيها إني بعدي من شارع رئيسي هناك علشان شغلي و بس ..
و كمان العجمي برضو أكتر من أبوتلات ما أعرفش للأسف عنها حاجة ، يمكن علشان العجمي منطقة مصايف و إحنا ما بنصيفش هناك
و لو بيعود النسيم اللي مشبع باليود لذهنك لما تفتكري اسكندرية ، بيعود النسيم المحمل بعواد السيارات بي لكايرو .. و أحببتها علشانك و علشان أقاربي و صحابي..كح كح كح !
على أبو طالب :
المرة الجاية هنطلعك رحلة مع فيولينا :)
واحد من الناس :
و الغريبة إنها الصبح غير بالليل ، موش عارفة أحدد أنهي الأحلى لكن أكيد المكان موش بيهمس لك بأسراره مرة واحدة
إسلام يوسف : :) ههههه ما تزعلش أوي كدة ، دة انتوا أهل أنيس منصور برضو
محمد خير :
عاد الشتاء يا محمد ، إمبارح كانت أول شتواية للسنة دي :)
يحيى سالم :
اسكندرية حالة موش أي حد يفهمها ، عاوزة عين جواهرجي علشان يحكي و يوصف و يتكلم علشان نعيش
و ماتقلقش ع اليوناني
ياللاّ بقى كالينيختا
...
.رون
عشق..حب..جنون..اشتياق.. وحشة..شبق..
.........
بحر .. رملة ناعمة ..نجوم.. سما زرقا..قمر
....................
عيون .. ارواح .. شفاة..
.............................
ارضك يا اسكندرية بتنبض حكايات
حضرتك فهمتيني غلط
انا صحيح بعيد عن اسكندرية
بس لازم كل اسبوع ارجع لها
انا سايب مني حتة فيها
وعلى أي حال شكراً على الرحلة :)
أعشق محطة الرمل يوم الحد و أكون قاعد فى سيتى كافيه و الدنيا كانت بتشتى و لما تبطل و يبدأ المحل يقفل أقوم أمشى فى محطة الرمل بعد ما الشوارع أتغسلت بمياه المطر
و ريحتها غريبة بس بحبها
الاسفلت مبلول و الجاكيت التقيل عليا و الكوفية حوالين رقبتى
و الايس كاب على دماغى و ماشى أجرى ألعب أضحك أتمهل أبكى أعمل كل اللى فى نفسى
و أنا لوحدى فى الشارع
و الناس القليلة اللى فى الشارع تبصلى و تقول أيه المجنون ده
بس بحبها
بلدى و مدينتى للأبد
أسكندرية
حتى لما كان مطلوب منى فيلم تسجيلى لمشروع تخرجى كان عنها و كان تقديرى جيد جداً عليه
و حاططله تتر المقدمة أغنية شط أسكندرية لحبيبتى فيروز
أهى محاولة للغربة؟
أم هى شعور بالألفة مع كل الأماكن؟
أظنها الإثنين معا,
أثارتنى تعبيراتك ولم لاوهى تتحدث عن حبى اسكندرية, وأكثر ما أحب فيها هو جوهرة استانلى منظر البحر وهدوءه وجمال الكوبرى هناك, بصراحة كان حلم انى اروح يومين فى الصيف ده مع زمايلى بس ربنا مقدرش الحمد لله
بوست جميل واحساس جيد
رينيه
أنا كمان عاوزة جولة معاكم ، اشمعنى أنا ؟
على فكرة كلامك فكرني بيوم ما نزلت اسكندرية و سبتهم في البيت و نزلت أتوه في محطة الرمل ، و سبحان الله ، نفس اللفة اللي انتي لفتيها دي بالملي ، حتى عند المكتبات و بتوع الكتب
يوم الاحد بقى
كان اكتشاف لوحده
لما نزلت سينيما بالليل و أطلع على 10 تقريبا و ألاقي شوارع الرمل فاضييييييييية
و ألاقي ست ظريفة جدا أسألها عن الطريق و عن البلد اللي فضيت فجأة دي ، و توضحلي السبب ان عشان اليوم كان الاحد
و أستمتع بمشيي في الشوارع الفاضية الضلمة اللي فيها لمسة من برد عى الرغم اننا كنا في صيف
كان يوم راااااااائع بجد
وحشاني يا اسكندرية
انا بعشق اسكندرية في الشتا ونص نص في الصيف
بس المنطقة اللي انت بتتكلم عنها دي المصاروة يعرفوها زيهم زي الاسكندرانيه بالظبط ويحبوها زيهم كمان
النبي دنيال ومحلات الجلود وصفيه زغلول والسنيمات ومحمد احمد والفلافل والجبنه المقلية ومحطة الرمل والترام وتقف على البحر وتشوف القلعة والمرسي ابو العباس ومراكب الصياديين بعييييييييييد
رغم اني كنت في اسكندريه في اخر شهر تسعة لكن بجد وحشتني
العطارين تستاهل تدقيق اكتر من كده ..شوارعها وبيوتها القديمة هتشوفوا فيها اسكندرية بجد..ويا سلام بقى لو كنتى ممن يخضعون للنستولوجيا او الحنين الى الماضى ..هستمتعى بجد بين محلات الانتيكات اللى العطارين معروفة بيها وخدى الكلام ده من نستولوجية اصيلة وعطارينية منذ الميلاد والى الان
حلو اوي
أنا بعشق اسكندرية
بعشق كرنشها القديم المن أول محطة الرمل لحد القلعة
بموت في بحري و عمارات محطة الرمل
كل بيت مبني بطريقة تعقد
بوست رائع و صور أصبحت أكثر وضوحا
تسمحلي أطلق اسم اضافي للبوست
"الاسكندرية التي لا يعرفها أحد"
eskndrya...agml zkryaaatyyyy.....a7la ayam fe eldonia m3 elnas elly bt7bha 2dam elb7r...shkran enk fkrtny beha
ايه الحلاوة دي...المدونة رائعة..بس لو سمحتي تعرفي الناس بالبياصة ..علي اعتبار ان الخلاصة من البياصة....اسكندرية يا اجدع ناس ...اه وسلامي لاهل الكارنتينا الكرام
انتو مكبرين الموضوع شوية
انزلو اي محافظة و امسكو اول شارع و خشو رابع شمال ثم اكسرو تاني يمين في تاني يمين و ارجعو حتلاقو نفسكم رجعتو لنفس التة اللي كنتو فيها في الاول ..
حتخنقو اهلنا يعني عشان ربنا ادالكم شوية رمل و مية
ده ايه الشوفونية دي ياربي !
عمار يا اسكندريه..خراب يا دنيا
على النعمه انت رجعتونى لاحلى ايام..
بوسوا لى اسكندريه لحد مارجع ان شاء الله
لو كان فيه مدينة في مصر يتغنالها .. أكيد هتبقى اسكندرية
بحسدك على البوست ده
مش قصدي المعنى بس
الاسلوب
طريقتك في العامية
مش عارف اعبر كويس
يمكن قلة نوم
بس بوست جميل لما تقراه في البرد ده
او محاولة للهروب من التيه !
كلو ماشي تايه
بلوج جميل ..
---
ملاحظة خارجية
هوا ليه العداد مكتوب فوقيه دخلاء :ي
دخلاء = جمع تكسير :ي
دخيل = مفردها
يعني اي حد بيخش البلوج ده يبقا دخيل
اي متطفل ؟ :ي
أنا بقى متطفل
لأ أكبر متطفل فى مصر
ازاى تتكلموا عن اسكندربة من وراياااااااااا
اسكندرية انا و انا اسكندرية
انا مصرى نفسه يبقى اسكندرانى
بجد مدونة اسكندرانية مجنووووووووووووووونة
بس ليه بطلتوا كتابة
يارب يكون خير
لو مشغولين قولولى و انا اتصرف
مالكوش دعوة
alexandromania forever !!!!!
شكرا اوي بس بعد كده الواحد يبقى معاه خريطه للمكان قبل ما يدخله احسن يعني الواحد قبل ما يدخل بيته يشتري خريطه لحسن تجيله الحاله
جميل اوي احساس عالي دمج الحته كلها مع بعضها
تسلم ايدك
Post a Comment
« Home