Sunday, April 29, 2007

عرض خاص

أعزائى المدونين لأول مره فى الأسكندريه يحصل تعاون بين المدونون و السينما المستقله , كان التعاون على الفراغ السيبرى قبل كده فى صوره أعلانات عند ده و لا ده المهم إن دى أول مره ينتقل التعاون الى أرض الواقع

كنت أتكلمت قبل كده عندى فى المدونه على فيلم مستقل لمخرج سكندرى صاعد ، واعد و أعلنت على ميعاد عرض الفيلم و الدعوه على النت جابت نتيجه كويسه و كانت القاعه كومبليت...بس المره دى أحب من موقعى هذا أمام الكيبورد أننى ادعو كل المدونون السكندرين لحضور عرض خاص لنفس الفيلم..العرض مخصص للمدونين و بس ... يعنى لازم تسيب اللينك بتاع مدونتك على الباب و لازم بعد كده تكتب على الفيلم فى مدونتك ... بالسلب كان أو بالأيجاب...بس المهم تكتب عن الفيلم

الجميل فى الموضوع ده أنه بينشأ علاقه بين المدونين ككتاب مستقلين و السينما المستقله... تعالوا ننشأ مجتمع مستقل ليه كتاباته و فنه و حركاته السياسيه و حملاته و ننخلُى ده أتجاه
انا عن نفسى كان ليا تجربه شخصيه مع الموضوع ده... كنت قبل كده نشرت عن الفيلم ده تحديداً بوست كأعلان علشان الناس تيجى و تتفرج على حاله مختلفة ... لقيت بعد كده أنه أصبح من الأتجاهات الأعلانيه الجديده ... فجالى منتجين فيلم بوسطه عايزينى أعلنلهم عندى على البلوج .. شرحتلهم أن انا ماشفتش الفيلم و ماقدرش أعلن عن حاجه ماشفتهاش... كان الأتفاق أننى أكتب عن بس أن الفيلم هينزل و هم هيعملولى دعوه خاصه لحضور الفيلم قبل العرض و بعد كده أكتب عن الفيلم سلبا كان أو إيجاباً

الفكره أديتنى أحساس بشرعيه و تقدير اللى بكتبه على البلوج المتواضع بتاعى... و قررنا نعمل كده لكل البلوجرز و من هنا كانت الفكره دى ... عرض خاص للبلوجرز لحضور فيلم مستقل فى عرض خاص على أنهم يكتبوا عنًه فى بلوجاتهم نقدهم للفيلم و يعلنوا بعد كده عن ميعاد العرض اللى جاى

علشان كده سيداتى و أنساتى و سادتى ... يسرنى أنُى أعزمكم على العرض الخاص لفيلم جزر فى المركز الثقافى الألمانى يوم الأربعاء 2 مايو ...بعد بكره الساعه تمانية بليل ... الفيلم مدته ساعه و شويه... على أنكم تكتبوا عن الفيلم بعد كده براحتكم فى مدوناتكم و تعلنوا عن ميعاد العرض اللى بعده

الأعلان اللى فات بلا مقابل مادى ماعدا كوبايه الشاى اللى أتعزمت عليها على القهوه علشان الشفافيه
و كلُه على عينك يا تاجر

--------------------------

تحديث: أمبارح كان العرض فى المركز الثقافى الألمانى و حضر من البلوجسفير عماد شباك و سولو و مرايات و باربى هانم و بيبو و بهظ و مويا و سفسطائى و الأحتمال المستبعد و رارا و أخيرا أحمد نبيل ده غير المدونات اللى أتكلمت عن ده و مجاتش زى همس الليل

دلوقتى بقى نعلق على اللى حصل...بغض النظر عن مستوى الفيلم اللى كل من اللى فوق دول المفروض يتكلموا عنُه ...القضيه أن ازاى نعمل لينك حقيقى بين أفراد المجتمعات المستقله مش بس فى أسكندريه لا و كمان فى مصر...اللى حصل أمبارح أن شويه صحاب أتجمعوا تحت مسمى أنهم بلوجرز طبعا مع شويه أصحاب تانيين من مجالات مختلفه بس بدايه كويسه ممكن بعد كده يجى ناس أكتر بس ننشط شويه

انا عن نفسى فى ناس من اللى حضرت دى ماكنتش أعرف أصلا أنهم بلوجاويه زى أحمد نبيل و ناس تانيه أعرفها كبلوجرز و معرفهومش على الحقيقه زى مويا بس كنت أتمنى أن ناس أكتر تيجى العرض

مهو أصلنا لو بنطالب بأن نوع تانى من الفن يبتدى يتقدم بدل التفاهه المعروضه حالياً يبقى لازم نشجعها فى الأول على الأقل بحضورنا ليها... لكن لو أننا هنستناها تنزل على النت مش هنوصل لحاجه ... ليه لأن الافلام دى ساعتها مش هتلاقى الدعم الكافى ... يافرحتى أن مصر كلها شافت رجال لا تعرف المستحيل ... فين بقى النوعية دى على السينما ... ليه المنتجين عمالين ينتجوا لمحمد سعد ... لأنه بكل بساطه بيقدر يجيب جمهور بغض النظر عن اللى بيتقدم ...لكن لما منتج يجيله سيناريو زى جزر مش هيفكر للحظه أنه ينتجله ... لأننه متأكد أنه مش هيبيع...هيخش فى مخاطره ليه...إذا كنا عايزين فن بيرتقى بالعقل يبقى لازم نحاول نساعد المحاولات اللى بتمشى فى السكه دى بحضورنا على الأقل

أنا أعتقد أن بلوج زى كيس فشار ممكن ياخد الرياده فى موضوع زى ده... بلوج ليه زوار بيثقوا فيه و ممكن يتعامل أصحابه على أنهم نقاد سينمائيين بجد و يحضروا حفلات من هذا النوع لنقد الأفلام و الكتابه عنها لجمهور مختلف و على الناس أنها تدافع على الحاجه اللى بتحبها

على العموم انا أتمنى أن اللى يقدر يحضر يوم 8 مايو فى المركز الثقافى الفرنسى الساعه واحده الظهر يحضر... هينبسط جدا لأنه مش بس هيشوف فيلم جزر ... و كمان هيشوف مجموعه من الأفلام المستقله الطويله زى إيثاكى للمخرج أبراهيم البطوط و المدينه للمخرج يسرى نصر الله و بعيد لأندريه تيشينه ... يعنى هيبقى وجبه دسمه و الساعه تمانيه بليل هيبقى فى مائده نقاش مستديره يتضم مخرجين الأفلام دى زائد عدد من الأعلام فى مجال دعم الافلام المستقله

و نشوفكوا على خير

Posted by Bahz.Baih at 3:34 PM 9 comments