إسكندرية
المشهد ده بيحصل معايا على طول كل أما أقابل حد من مصر و يسألنى إنت من فين بقى من مصر يا هندسة أقوله من إسكندرية و على طول بيكون الرد أنا قعدت مش عارف أد أيه هناك أصلى كنت فى شغلانة كده أو أصلى كنت بدرس هناك أو أو أى غرض من أغراض الأقامة فى إسكندرية
و تبدأ البجاحة من بعد الجملة دى : و إنت ساكن فين بقى فى إسكندرية يا هندزة
أنا أرد الرد اللى رديته تلميت مرة بحكم إنى عارف بقية الحوار حتبقى إزاى : ساكن فى سيدى بشر
الرجل يفكر فى عمق : مممممم سيدى بشر ساكن فين بقى بالظبط فى سيدى بشر
أنا أرد الرد اللى الخبرة و التجربة علمهوملى : إنت تعرف أيه فى سيدى بشر
الرد فى أكتر من تسعين فى المية من الحالات بيقى كوميدى جداً جداً من نوعية أعرف منطقة إسمها العصافرة فى سيدى بشرأو أنا ليا واحد صاحبى ساكن هناك كنت بروحله و يبتدى يوصفلك شارع صاحبه أو يقولك على إسم سوبرماركت كان عدى عليه فى السكة أو يقولك مثل أنا كنت أصلك كنت ساكن جنبكم فى الشاطبى
و أنا برضوه بقيت برد بعنف بحكم الخبرة و أنا بضحك فى إصطناع بغرض إحراج الشخص البجح : يا عم العصافرة أيه بس , يا عم الشاطبى بعيدة عن سيدى بشر أيه علاقة دى بدى أو أبدأ فى إشتغال الشخص لو توافر شخص إسكندرانى تالت فى القعدة أيوة يا عم أنا ساكن قدام قصر المنتزة بعد ما تعدى من بوابة سيدىبشر على طول
من الحاجات اللى بتخلى الواحد مبسوط و فخور فعلاً إنه إسكندرانى لما بيقابل ناس تعرف إنه إسكندرانى و تبدأ تتمحك فى إسكندرية , و الشخص يبقى فاكر علشان قعدله كام شهر فى إسكندرية أو علشان ضربله غطسين بقى إسكندرانى خلاص . التمحك وصل لواحد مرة كان بيسألنى عن مكان سكنى فى إسكندرية ولما قولتله إنى ساكن فى سيدى بشر سكت شوية و قالى هية دى فين بالنسبة للحضرة القبلية , إكتشفت بعد كده إنه كل علاقته بإسكندرية إنه كان لما كان فى الجيش كان بيروح من بلده لحد إسكندرية علشان يركب منها لمطروح و إنه فيه واحد معاه فى الجيش ساكن فى الحضرة القبلية و إنه راحله كام مرةبس !! هى دى علاقته بالأسكندرية
الراجل صاحب الشغل كان بيكلمنى من يومين و أنا كنت عمال أسايره و أحسسه إنى حعمل اللى هو عايزه و الراجل مع العِشرة عرف إنى بشتغله كل مرة و بعمل اللى على مزاجى فى الأخر فجى بيقولى يا جدع إنت بلاش شغل الأسكندرانية ده بقى , طب لعلمك بقى أنا أصلاً إسكندرانى
رديت عليه بكل ثقة و قولتله لأ إنت مش إسكندرانى
قالى أيش عرفك ,
قولتله معندكش السيم بتاع الأسكندرانية مبتقولش عالشاى شى و بتقولى مرة عالجومة أستيكة و كلام يامة بيطلع منك ميصحش يطلع من إسكندرانى صميم
الكلام بالرغم من خزعبليته لكن علشان طلع منى بثقة و أداء تمثيلى مسرحى ,
الراجل سكت شوية و بعد كده قالى أمى من عندكم والله العظيم من العصافرة قبلى حتى
قولتله الحاجة ماشى لكن إنت لأ
لازم تسمع جملة بس إسكندرية جميلة فى نهاية كلام أى شخص عن إسكندرية , من الصفات المشتركة عند كل المصريين إنهم بيحبوا الأسكندرية , و اللى فعلاً بييجى إسكندرية كتير و بيحبها لازم يقولك الجملة دى فى كلامه بس إسكندرية جميلة جداً فى الشتا , المصيفين الله يخرب بيتهم بيبوظها فى الصيف
تعاملات الناس مع الأسكندرانية عادةً بتختلف بعد لما بيعرفوا إن الشخص إسكندرانى , إنطباعات أولية بتبان أوى لما الشخص يعرف إنك من إسكندرية فيقولك اه يعنى إسكندرانى بيحسسنى إن الأسكندرانى جنسية مختلفة عن المصرى
ردود الأفعال بتبقى غريبة و غير متوقعة , مش حنسى أول شخص خليجى قابلته هنا و مش فاكر كانت جنسيته أيه الصراحة ولما عرف إنى إسكندرانى قعد يسألنى بإهتمام شديد عن بيت ريا و سكينة و إذا كان لسة موجود و قعد يقولى إنه مخطط من فترة يسافر مخصوص إسكندرية علشان يروح بيت ريا و سكينة
أو الراجل العراقى الظريف اللى أول ما عرف إنى من إسكندرية قعد يضحك بعنف و يقولى أيووووه يا جدعان إزيك يا أبو حنف الدراما المصرية قدرت توصل للمواطن العربى فكرة إن جملة أيووووه يا جدعان هى بسم الله الرحمن الرحيم بتاعة الأسكندرانى و إن الأسكندرانية كلهم بيتكلموا بطريقة يا سلام يا جدعان داحنا نخدموكم بعينينا و هكذا
مش حنسى برضوه الراجل اللى كان معايا فى أول شركة أشتغل فيها لما سألنى إنت من فين قولتله من إسكندرية الراجل دور وشه الناحية التانية و هو بيقول أعوذوا بالله أنا مبخافش فى حياتى إلا من الأسكندرانية
مش حنسى لما كنت فى جزيرة قشم الأيرانية و كنا بنشترى حاجات من السوبرماركت و نظراً لأننا يومياً كان بيتنصب علينا , إتفقنا إننا حنكون صاحيين المرادى , دخلنا السوبرماركت عصبة من مختلف الجنسيات أنا إسكندرانى وواحد مصرى وواحد يمنى وواحد عراقى وواحد سورى جه ساعة الحساب فوجئت إن السورى بيقولإنى أنا اللى أتولى عملية الحساب علشان أنا إسكندرانى معرفش أيه فكرته بالظبط عن الأسكندرانية لكن فكرته حازت على إعجاب الجميع و أيدوها بشدة و صراحةً أنا تملكتنى روح الأسكندرانى و حس الدفاع عن سمعتنا كإسكندرانية و إبتديت أبين لصاحب المحل إننا مش سذج و عارفين إن العملة هناك مش فاكر إسمها أيه والله بتساوى كذا , و إبتديت أفاصل معاه فى أسعار الجبنة و المربى , أنا اللى عمرى ما فاصلت بقيت بفاصل فى تمن الجبنة , طلعنا من المحل فخورين بإنتصارنا و إننا لأول مرة ميتنصبش علينا , قبل ماسيب قشم بيومين إكتشفت إن كل تحويلات العملة اللى كنا بنعملها كان بيتنصب علينا فيها و إن الدرهم كانت قيمته أعلى مما كنا حسبنها بمقدار أقل من الضعف بكتير و عرفت ساعتها ليه بس الراجل ساعات كان بيسامحنا لو باقيله درهم ولا حاجة
يمتلك الناس فكرة عامة عن الأسكندرانية إنهم بتوع كلام و إنهم بقاق و هجاصين و أونطجية و إن الحشيش شىء أساسى فى حياة المواطن الأسكندرانى و إنهم دمهم خفيف و نُزهيين و إن الأسكندرانى كائن محب للحياة ودماغه عالية و رايق جدً و الصراحة أنا متفق معاهم بنسبة كبيرة فى الكلام دهو يفسرولك كده من نفسهم بإرتباط الأسكندرانية الشديد بالبحر و التمشية على الكورنيش و إقتناع الناس بإن مجرد وقفة الشخص قدام البحر فى ساعة عصارى قادرة إنها تنسى الواحد هموم العُمر كله
Posted by ماشى الطريق at 9:04 AM
26 Comments
وايه رايك بقى في الاجانب اللي بيبقى عندهم نفس النظره
اقصد اجانب باروبيين
لانهم اشتغلو في اسكندريه قبل كده وتقابل واحد منهم في موقع يقولك منين يعرف انك مصر
واسكندراني
ههههههههههههههههههه
بتتطلع منهم تعبيرات غريييييييييييبه
تحياتي على البوست الجميل ده
السلام عليكم
اعتقد ان جملة تمشية على الكورنيش قاهرى شوية
عادة بنقول نتشمى عالبحر , قاعدين عالبحر , الازاريطة علبحر
صح ؟
تحياتى
ملك الكبدة من قلب الاسكندرية يسجل اعجابه الشديد بهذه المدونة و باسلوب كتابتها
فعلا حاجة غريبة انا لما كنت في جامعة المنصورة و اقول انا من اسكندرية
يطلعلي واحد فكيك احس انه شيخ عموم مشايخ حواري مصر و اسكندرية خاصة و ينفحني السؤال التاريخي
منين في اسكندرية
انفحه انا كمان اجابة تاريخية من نوعية انت تعرف ايه في اسكندرية
ينشكح السائل و يقولكك يوووووووووووووووووه
البيطاش و الهانوفيل و محطة الرمل و سيدي جابر و جليم و ميامي و شارع خالد
و يكون التصحيح الصادم مني
يابني /يابنتي
انتوا فاكرينها مدينة صغيرة
الحتت دي اللي مايعرفش غيرها هما الزوار العاديين
و ابدا اثبت كلامي لما اقول اني من باكوس و تظهر الدهشة حين يعرفوا ان باكوس خمس دقايق مشي من جليم
عموما يا صاحب هذا البلوج المعبق باليود الجامد انت ناقشت قضية مهمة كلنا كاسكندرانية بنعاني من نباهة مثيريها
آسف للاطالة بس التدوينة عجبتني اوي
بجد بوست جااااااامد
انت مسيبتش موقف غير وحكيته
واضح ان المعاناة بتتكرر بحذافيرها
وواضح ان كلنا اخدنا نفس الخبرة واتعلمنا الحوار ازاي يكون رايح جاي
ساكن فين في اسكندرية
بعدها علطول نسال
انت تعرف اماكن ايه في اسكندرية
الموقف المتكرر بكثرة برضة ... لما حد مش اسكندراني ويستني مني كلمةا يوووه وللا اني اتكلم بصيغة الجمع في كلامي وكانها بديهيات طالما من اسكندرية
بجد بوست جميل
تحياتي
ايووه ديه انا عمري ماسمعتها غير في المسلسلات . متهيألي فعلا اننا بنقول نتمشى عالبحر
بوست جامد
بيفتكروش غير كلمة أيوووووه
وبينسوا كلمة
أحيييييييييييييه!
انت نسيت البيره على فكره
كلامك صحيييييح تماما، لم أجد أحدا لم يحب اسكندرية، رغم كل المناظر السيئة مؤخرا، من سرقة أغطية البلاعات في الشوارع وتكسير الشوارع..
إلا أنها رائعة، لم أحب مثلها في حياتي..
This comment has been removed by the author.
دا انت اسكندرانى بس قلبك مش تمام
عملولك ايه بتوع القاهرة
يا عم ده انا نزلت عندكم اسكندرية وماشى بعربيتى فى امن الله لقيت التاكسيات شغالين ياللا يا جيزة ومش عارف بقى قصدهم ايه
لدرجة ان واحد صاحبى من عندكم كان شارى عربية من عندنا ملاكى جيزة مقدرش يمشى بيها فى اسكندرية اكتر من شهر وغير النمر
احاااااااااااااااااااااا بجد
لا استبعد قريبا ظهور مدون من كفر ابو شخة يتافخر بشخاويتة المجيدة ويستنكر علي الغرباء عدم معرفتى بدروب واحياءالشخة
**************
معلش اعذرني ليس من عادتي انتقاد المدونات البضينة او التعليق فيها علي الحاجات اللي بتخنقني بس المرة دي فعلا مقدرتش امسك نفسي
*********
اسمحلي تاني اقولها
اسكندرية هئ هئ هئ احااااااااااااااااااااااااااااااااااااااااااااااااااااااااااااا
وشكرا علي سعة .....
صدركم
السلام عليكم
هو الصراحة البوست حلو
انا عن نفسي عندى اصحاب في الكليه من اسكندرية ولما كنت بتعرف عليهم في الاول كنت بسالهم نفس الاسئلة اللي كانت في البوست وبرده كانو يتحفونى بالجملة الشهيرة...تعرف ايه في اسكندرية
ومع انى رحت اسكندرية كتير اوي لكن ساعات بكتشف ان معرفش حاجة خالص
وبرده لما سافرت القاهرة محبتهاش خالص
فعلا تحس ان دمها تقيل وقاسية على الغريب منها
لكن اسكندرية حنينة وروحها خفيفة وبحبها جدا وبحب اهلها
بس ملحوظة صغيرة كده
انتو مش شايفين انكو بتتعاملو مع اي حد مش من اسكندرية على انه من كوالالمبور مثلا
وبعدين تيجو تستغربو وتسألو هما بيعاملونا معامله خاصة ليه
حاسس ان البوست ده عنصري شوية
يا جماعة احنا كلنا مصريين
وبالنسبة للاخ misha-lado
مش اوي كده يا عم
ملهاش لازمه احا ومش احا
متخدش على صدرك يعني انا من كتر ما عاشرت الاسكندرانيه عرفت انهم بيعتبرو اي حد مش من اسكندرية كأنه كائن من كوكب اخر
صح يا اسكندرانيه ولا ايه
وعلى فكرة انا ضيفتكم على مدونتى لان مدونتكم عجبتنى
وياريت تتقبلو تعليقي بصدر رحب
سلامات
لأ اللى كان يفرسنى بقى
كنت فى الصعيد
وكنت كل ما أقول لواحد أنا من الاسكندرية
يقولى روحت مكتبة الأسكندرية
كأنه مهتم قوى بالثقافة والمكتبة
بس برضه نعمل إيه
كل الناس بتحب إسكندرية
وتتمنى تتمسح فيها
السلام عليكم ورحمة الله وبركاته
دي اول مره اعلق هنا مع اني باجي كتير اوي وقريت تقريبا كل البوستات الموجوده
الاسكندرانيه يا سيدي علي عينا وراسنا ، وما نقدرش ننكر ان كل مصر من شمالها لجنوبها ومن اقصها لادناها بيحبوا اسكنريه ويموتوا فيها خصوصا كمان بعد التجديدات الجديده اللي بداها المحافظ السابق من فتره ،وانا شخصيا باحسد اي حد عايش في مدينه ساحليه كفايه اوي ان يكون فيه بحر تقدر تطلع لما تكون قرفان تقعد عليه وترمي همومك فيه
-------
رجاء والنبي تغيروا الخلفيه الصفرا دي اللي هاتجيبلنا عما الوان وشكرا
تحياتي
هههههههههه واللة انا مت ضحك وانا بقرا البوست دة هو معاك حق صراحة ان دموكوا يتحرق لما تلاقى الغريب قبل القريب بيتمحك فيك بس دة واللة يا جماعة حب فى الاسكندرانية
وفعلا مش هتلاقى واحد فى مصر يقولك ربع كلمة على الاسكندرانية
انا عن نفسى عاشقة للاسكندرية واموت فى كل حاجة ليها علاقة بسكندرية وشرط اساسى انى لما اتجوز اتجوز اسكندرانى ولو لا سمح اللة الاسكندرانية خلصوا من السوق هجى برضة اعيش عندوكوا غلاسة بقى
فعشان تكونوا فهمين بس دة كلوا حاجة متزعلش
المصريين كلهم بيعاملوا الاسكندرانية فعلا معاملة مختلفة
بيعاملوهم على انهم اجدع ناس
ولا اية
الموضوع ده لاقيته مصادفة متاخد نقل مسطرة هنا في موقع جامعة أون لاين
http://www.gam3aonline.com/art_read_n.asp?id=4395
فحبيت أنوه بس
انا بجد مش عارفةاقولك ايه بس كل ما بقرأعندك بوست عن اسكندرية ببقى فخورة جدا انى اسكندرانية ومدونتك ليها ذكرى ليا جميلة لانها اول مدونة سكندرية اقراها وهيا اللى دفعتنى انى اعمل مدونة شكلها اسكندرانى
بجد البوت بتاعك جميل جدا وفعلا التمشيةعلى البحر ساغةالعصارى بتنسينا الدنيا باللى فيها وياسلام لما تكون تمشيةمع الشلة
عجبنى اوى تعليق الاخ ملك الكبدة لانى لما بكلم حد مش اسكندرانى ويقولى منين فى اسكندرية بردك عليه نفس رده بردك فبقوله انتم بيتجوا زيارة بتشوفوا وش القفص بس وياسلام لما اقول انى من باكوس تريقة بقى ومش فاهمين يعنى ايه باكوس وياسلام على خفة الدم لما يوقولك واحد من دول باكوس ولا فاقوس وتفضل تشرح الاذاعة زيزنيا جليم يا عم طيب وينسيك المكان ههههههههههاصلا
very nice a blog :)
طيب وانت منين بقى فى اسكندرية:))
يعني كل التنطيط دا والدوشة دي والموضوع مسروق مش كفاية انك اسكندرانية كمان حرامية
اخصصصصص
هل براء الخطيب اسكندراني؟
http://maiabonawaya.blogspot.com/2008/08/blog-post_1721.html
http://maiabonawaya.blogspot.com/2008/06/blog-post.html
http://maiabonawaya.blogspot.com/2008/06/blog-post_05.html
http://maiabonawaya.blogspot.com/2008/08/blog-post_1414.html
دول لينك لحجات كتبتها عن اسكندريه علي فكره انا للاسف مش اسكندرنيه
عاجبني البلوج بتاعك قوي اسلوبك لذيذ حسيت كده اننا قاعدين سوا وبنتكلم بجد ممتع قوي
3la 2d ma klamk sa7, 3la 2d ma wg3teny 3shan 7asyt eny 3omry mahma 23t f askndryia 7b2a askndranyia !!
hello...
i wanna say that in spite of all what u mentioned..still alex bears a different kind of magic
greetings 2 all alexandrians
Post a Comment
« Home